Der Doud an der Däiwel
Photo: Claude Piscitelli
D‘Geschwëster Bea, Margot a Karel hunn et am Liewen zu eppes bruecht. Dat géif ee menge wann en se héiert téinen op der Gebuertsdagsfeier vun hirer Mamm Arlette. Ee fuschneie Bentley, eng 30 Meter Yacht an eng vill, vill méi jonk Verloobten. Deenen Dräi schéngt et u näischt ze feelen.
Doriwwer freet sech och hir Mamm, déi op hiren 80. Gebuertsdag matdeelt dass si hiert Testament zu Gonschte vum lokalen Déierenasyl wëll ännere loossen. Schliisslech huet jo jiddereen an der Famill ee respektabelt Akommes. Do kann dat net manner respektabelt Verméige vun der Mamm jo engem gudden Zweck zoukommen.
Esou labber schéngt den, op groussem Fouss liewenden, Nowuess dat awer net ze gesinn. Wéi bekannt gëtt dass d‘Arlette net méi laang ze liewen huet, an dass den Termin beim Notär schonn nächste Méinden ass, fänken d’Fassade vun deenen dichtege Geschwëster u Rëss ze kréien.
Et muss onbedéngt verhënnert ginn dass déi schéin Ierfschaft an Hondsfudder investéiert gëtt, a geschwë sinn déi Dräi an
ee mäerderesche Komplott verwéckelt.
Awer déi rüsteg Seniorin huet nach déi eng oder aner Iwwerraschung parat, an ass net esou einfach aus dem Wee ze raume wéi geduecht.
Et erwaart Iech déif schwaarzen Humor mat op der Bün:
Karin Goffinet, Marcel Heintz, Rachel Leus, Fabienne Frost, Sally Thill, Claude Leus, Chantal Nether, Vera Gaddé, Roland Flenghi a Jules Orlando.
Regie:Romain Pierrot assistéiert vu Patricia Breuer a Romain Graul
Iwwersetzung an Adaptatioun: Anne Schadeck a Romain Pierrot
Kostümer a Schmink : Sylvie Weis
Bünebild: Anne Schadeck
Bünebau: Claude Leus, Romain Graul, Lex Neu, Arnold Bosseler a Jang Winandy
Luucht an Toun: Mike Kayser an Arnold Bosseler
Wéi ëmmer ënner dem Motto :
Wien hei net laacht ass selwer schold!
Och wann erëm ka gelaacht ginn, wëlle mir drop opmierksam maachen dass dëst Stéck fir Kanner ënner 12 Joer net gëeegent ass.
Première den 16. November 2024 Weider Datumer am November 17. 22. 23. 24. 29. 30. an am Dezember 1. 7. 8. um 20.00 Auer a Sonndes ëmmer um 18.00 Auer